Sa prodhohet ushqimi organik në Kosovë

Një tendencë e re po zhvillohet mes kosovarëve, “dashuria” për organiken dhe natyralen. Në konceptimin se çfarë produktesh janë vërtet organike dhe çfarë natyrale ka ende mjegull. Numri i operatorëve në proces apo të certifikuar si organikë në Kosovë është në rritje vit pas viti, ndërsa 1/4 e prodhimit shkon për eksport.
Kosovarët “mburren” jashtë me bimët e tyre aromatike, ndërkohë në tregun tone hapet i pari supermarket me produkte 100% bio…

Ushqimet organike janë ato ushqime që rriten në mënyrë natyrale dhe nuk përmbajnë përbërës artificial. Ushqimi  organik ka ndikim të madh dhe pozitiv në shëndetin tonë mendor dhe emocional, si dhe në mjedis.

Objektivi strategjik

Objektivi strategjik i Ministrisë së Bujqësisë, Zhvillimit Rural dhe Administrimit të Ujërave dhe institucioneve të tjera me detyra në këtë fushë, është garantimi i rritjes së sasisë dhe cilësisë së prodhimit organik. Kjo jo vetëm për faktin e gjenerimit të eficencës ekonomike (rritjes e të ardhurave) por edhe garantimit të rritjes së cilësisë së jetesës për konsumatorët. Nga ana tjetër prodhimi organik konsiderohet si avantazh i rritjes së mundësisë së eksportit në rajon dhe me gjerë, duke mundësuar kështu rritjen e konkurrueshmërisë së produkteve kosovare si dhe ndikuar në reduktimin e importit dhe rritjen e eksportit.

Prodhimi Organik në Kosovë

Moti i ngrohtë dhe klima e favorshme e bëjnë Kosovën një burim ideal të prodhimit organik, duke i shtuar kësaj edhe një tokë pjellore. Për të konkurruar denjësisht në një treg ndërkombëtar, ku fuqia blerëse është e informuar dhe e orientuar drejt cilësisë, fermerëve kosovar do t’u duhet të marrin masat e duhura për të përmbushur pritshmëritë dhe kërkesat, duke certifikuar produktet e tyre. Certifikimi ka disa kritere që duhen përmbushur.

Ne pëlqejmë ushqimet organike. Shumë supermarkete në Kosovë ofrojnë një kënd për ushqimet bio.

Ushqimi organik është produkt i një sistemi bujqësor, që shmang përdorimin e plehrave artificiale, pesticideve, rregullatorëve të rritjes dhe suplementët e ndryshëm në ushqyerjen e bagëtive.

Bujqësia organike është një sistem i qasjes ndaj prodhimit, që punon drejt prodhimit të qëndrueshëm nga pikëpamja ekologjike, sociale dhe ekonomike.

Ja çka duhet të dini rreth produkteve organike:

1: Produktet organike nuk përmbajnë pesticide. Kimikate si fungicide, herbicide dhe insekticide përdoren gjerësisht në produkte joorganike dhe pjesë të tyre mbeten në ushqimin që hamë. Kimikate të tilla nuk përdoren në produkte organike asnjëherë.

2: Produktet organike janë më të freskëta sepse nuk përmbajnë konservues që t’a bëjnë atë të zgjasë më gjatë. Ushqimet organike përmbajnë lëndë ushqyese të dobishme dhe shumica e simptomatve të njerëzve me alergji ndaj ushqimeve, kimikateve ose konservuesve, pakësohen ose largohen kur ata hanë vetëm ushqime organike.

3: Produktet organike janë më të mira për mjedisin. Praktikat e bujqësisë organike zvogëlojnë ndotjen, kursejnë ujin, zvogëlojnë erozionin e tokës, rrisin pjellshmërinë e tokës dhe shpenzojnë më pak energji. Bujqësia pa pesticide është gjithashtu më e mirë për zogjtë dhe kafshët, si dhe për njerëzit që jetojnë pranë fermave.

 4: Kafshëve të rritura në mënyrë organike NUK u jepen antibiotikë ose hormone të rritjes. Ushqyerja e kafshëve me hormone të rritjes shkakton sëmundje te kafshët fillimisht, të cilat mund të transmetohen te konsumatorët. Ndërsa përdorimi i antibiotikëve në ato kafshë krijon lloje të baktereve rezistente ndaj antibiotikëve, një ndër problemet më të mëdha të mjekësisë bashkëkohore.

5: Produktet organike nuk janë të modifikuara gjenetikisht. Produktet e modifikuara gjenetikisht janë produkte të cilave u është ndryshuar ADN-ja në mënyra që nuk janë natyrale dhe modifikime të tilla lidhen me shkaktimin e shumë sëmundjeve, duke përfshirë dhe kancerin.

Sa më shume produkte organike që konsumoni, aq më të shëndetshëm do të jeni dhe do të ndiheni.